သတင်းစာဆရာကြီး ဦးဝင်းတင် လွတ်မြောက်

ထောင်ထဲတွင် ၁၉ နှစ်ကျော်နေခဲ့ရသော သတင်းစာဆရာကြီး လွတ်မြောက်ပြီ


ချင်းမိုင်။ ။ အကျဉ်းထောင်အတွင်း ၁၉ နှစ်ကျော်ကြာနေခဲ့ရပြီးနောက် သတင်းစာဆရာကြီး ဦးဝင်းတင်သည် ယနေ့ အင်္ဂါနေ့ ညနေတွင် လွတ်မြောက်လာပြီ ဖြစ်သည်။

စစ်အစိုးရ၏ အဓိက အငြိုးထားခြင်း ခံခဲ့ရသည့် အသက် ၇၈ နှစ်အရွယ် ဦးဝင်းတင်သည် ယနေ့ လွှတ်ပေးသော အကျဉ်းသား ၉၀၀၂ ယောက်တွင် ပါဝင်ခဲ့ခြင်း ဖြစ်သည်။

ဦးဝင်းတင်သည် ယခုလောလောဆယ်တွင် မိတ်ဆွေရင်းဖြစ်သူ ဦးမောင်မောင်ခင်၏ နေအိမ်သို့ သွားရောက်နေထိုင်လျှက် ရှိသည်။

ညနေ ၄ နာရီတွင် ပြန်လည် လွတ်မြောက်လာပြီးနောက် ဦးဝင်းတင်က "ကျနော်က နိုင်ငံရေးသမားတယောက် ဖြစ်တဲ့အတွက် နိုင်ငံရေးပဲ ဆက်လုပ်မှာပဲ၊ အဲဒီကိစ္စကို အရှံးပေးဖို ဖိအားပေးတဲ့ ပုဒ်မ ၄၀၁ ကို လုံးဝ လက်မှတ်မထိုးခဲ့ဘူး။ ဒီနေ့ကစပြီးတော့ အမျီုးသား ဒီမိုကရေစီ အဖွဲ့ချုပ်နဲ့ ဒေါ်အောင်ဆန်းစုကြည်ကို ဆက်လက် ထောက်ခံသွားမှာပဲ ဖြစ်တယ်။ ကျနော်အသက် ၈၀ ပြည်တော့မယ်။ ဒါပေမယ့် ရပ်မှာတော့ မဟုတ်ဘူး။" ဟု စာနယ်ဇင်းသမားများကို ပြောကြားသည်။

"တိုင်းပြည်မှာ ဒီမိုကရေစီ ဖြစ်ထွန်း ပေါ်ပေါက်လာတဲ့အထိ ကျနော် ဆက်လက်ပြီး တိုက်ပွဲဝင်သွားမယ်" ဟု ကျန်းကျန်းမာမာ ရှိနေသည့် ဦးဝင်းတင်က ရိုက်တာ သတင်းဌာနကို ပြောကြားသည်။

အမျိုးသား ဒီမိုကရေစီ အဖွဲ့ချုပ်ဝင်များဖြစ်သည့် ဗိုလ်ကြီး ၀င်းထိန်၊ မရမ်းကုန်းမြို့နယ် ပြည်သူ့လွှတ်တော်အမတ် ဒေါက်တာ မေ၀င်းမြင့်၊ စမ်းချောင်းလွှတ်တော်အမတ် ဦးခင်မောင်ဆွေ၊ တောင်ငူလွှတ်တော်အမတ် ဦးအောင်စိုးမြင့်၊ သပိတ်ကျင်းမြို့နယ် အမျိုးသား ဒီမိုကရေစီ အဖွဲ့ချုပ်ဝင် ဦးအေးသိန်း တို့လည်း အချုပ်အနှောင်မှ ပြန်လည် လွတ်မြောက်လာပြီ ဖြစ်သည်။

အမျိုးသား ဒီမိုကရေစီ အဖွဲ့ချုပ် ပြန်ကြားရေး အဖွဲ့ဝင် ဦးသိန်းညွန့်က "သူတို့ လွတ်လာပြီဆိုတော့ ကျနော် အရမ်း ဝမ်းသာပါတယ်။ ဘာဘဲ ပြောပြောဗျာ၊ အမျိုးသာ ပြန်လည် သင့်မြတ်ရေးအတွက် ကောင်းတဲ့ဟာ ဖြစ်ပါစေဗျာ" ဟု မဇ္ဈိမကို ပြောသည်။

၂၀၁၀ ခုနှစ်တွင် စစ်အစိုးရက ကြီးမှူးပြုလုပ်မည့် ရွေးကောက်ပွဲများနှင့် ဆက်ဆိုင်ပြီး အကျဉ်းသား ၉၀၀၂ ယောက်ကို လွှတ်ပေးခြင်းဖြစ်သည်ဟု အစိုးရအာဘော် မြန်မာ့အလင်း သတင်းစာတွင် ဖော်ပြထားသည်။

"မိမိအကျိုး၊ ဒေသ အကျိုးနှင့် ၂၀၁၀ ပြည့်နှစ်အတွင်း ကျင်းပမည့် တရားမျှတမှုရှိသော ရွေးကောက်ပွဲများတွင်လည်း အများပြည်သူတို့နှင့် အတူ နိုင်ငံတော် အကျိုးကို ထမ်းရွက်သွားနိုင်ရန် အတွက်လည်းကောင်း အကျဉ်းသား ၉၀၀၂ ဦးအား ပြစ်ဒဏ်ကျခံနေရခြင်းကို ရပ်စဲပေးလိုက်ပြီး သက်ဆိုင်ရာ အကျဉ်းစခန်း အသီးသီးမှ ပြန်လည် စေလွှတ်လိုက်သည်" ဟု မြန်မာ့အလင်း သတင်းစာတွင် ရေးသားထားသည်။

နိုင်ငံရေး အကျဉ်းသား ရှိသည်ဟူ၍ မည်သည့်အခါကမှ ၀န်ခံခဲ့ဖူးခြင်းမရှိသော စစ်အစိုးရက ဒီမိုကရေစီ ထွန်းကားရေးအတွက် အတိုက်အခံ နိုင်ငံရေး လှုပ်ရှားမှုများ ပြုလုပ်သောကြာင့် ဖမ်းဆီးခဲ့သူများနှင့် ပတ်သက်ပြီး ပြောဆိုထားခြင်း မရှိပေ။

နီးစပ်ရာမှတဆင့် လွတ်ကောင်း လွတ်လိမ့်မည် သတင်းကြားကာ ဦးဝင်းတင်၏ မိတ်ဆွေများနှင့် သူ့ကို လေးစားချစ်ခင်သူများက အင်းစိန်ထောင်ရှေ့တွင် ကြိုတင် စောင့်ဆိုင်းနေခဲ့ကြသလို နာမည်ဆိုးဖြင့် ကျော်ကြားသော အင်းစိန်ထောင်မှ ရာဇ၀တ်ပြစ်မှုဖြင့် ကျခံခဲ့ရသော အကျဉ်းသား ရာပေါင်းများစွာ လွှတ်ပေး၍ လာရောက် စောင့်ဆိုင်းနေသူများဖြင့် စည်ကားနေခဲ့သည်။

စောင့်နေကြရင်းနှင့် ထောင်ဗူးဝမှ အချိန်အတော်ကြာလင့်စွာ ထွက်မလာနိုင်သေးသည့်အတွက် သတင်းစာဆရာကြီး၏ မိတ်ဆွေများမှာ ယခင်တခေါက်ကဲ့သို့ ပြန်လည် ဖြစ်မည် စိုးရိမ်ပူပန်ခဲ့ကြပြီး ဦးဝင်းတင်ကို မြင်တွေ့ကြမှသာ သက်ပြင်းချနိုင်ကြသည်ဟု မဇ္ဈိမကို ပြန်လည် ပြောပြကြသည်။

အရှေ့တောင်အာရှ စာနယ်ဇင်း သမဂ္ဂမှ အလုပ်အမှုဆောင် အရာရှိ ရော်ဘီ အလမ်ပေက "အရှေ့တောင် အာရှ တလွှား၊ အာရှနဲ့ ကမ္ဘာ တ၀ှမ်းလုံးက သတင်းသမားတွေ အားလုံးဟာ ဦးဝင်းတင် လွတ်လာလို့ သိပ်ဝမ်းမြောက်ကြမှာပါ။ အကယ်လို့သာ လွန်ခဲ့တဲ့ နှစ်နှစ်ဆယ်လောက် ကတည်းက အရှေ့တောင်အာရှမှာ သတင်း လွတ်လပ်ခွင့်အတွက် ရုန်းကန်ခဲ့ရတဲ့ ပြယုဒ်တခုကို ပြပါဆိုရင် ဦးဝင်းတင်ကို ပြရမှာပဲ။ အရင်က သူ့ရဲ့ ဒီမိုကရေစီရေးအတွက် မပျက်မယွင်း ကြိုးပမ်းနေတဲ့ စိတ်ကို သိရတော့ အတော်လေး ခံစားရပါတယ်။ သူကတော့ ဒီဒေသရဲ့ လွတ်လပ်စွာ ဖော်ထုတ် ပြောဆိုခွင့်ရဖို့် ကြိုးပမ်းမှုတွေ ဆက်လက် ဖြစ်ပေါ်လာဖို့ အတွက် အရေးပါတဲ့ စိတ်ဓာတ်ခွန်အား တရပ်အဖြစ် တည်ရှိနေမှာပါပဲ" ဟု ပြောသည်။

အမျိုးသား ဒီမိုကရေစီ အဖွဲ့ချုပ်၏ ကနဦးတည်ထောင်ရာတွင် တဦးအပါအ၀င်ဖြစ်သူ ဦးဝင်းတင်ကို စစ်အစိုးရက ပါတီဝင်တဦး တရားမ၀င် ကိုယ်ဝန်ဖျက်ချရာတွင် သက်ဆိုင်ရာသို့ တိုင်ကြားခြင်းမရှိဟု ဆိုကာ ထိန်ချန်မှုဖြင့် ဖမ်းဆီး ထောင်ချခဲ့သည်။

နောက်ပိုင်းတွင် စစ်အစိုးရက ဦးဝင်းတင်သည် လူထုကို အစိုးရနှင့် ထိပ်တိုက်တွေ့အောင်လုပ်သူ ဒေါ်အောင်ဆန်းစုကြည်၏ အဓိက အကြံပေးပုဂ္ဂိုလ်ဟု စွပ်စွဲ ပြောဆိုခဲ့သည်။

ထောင်ကျနေစဉ်အတွင်း နိုင်ငံရေး ဆန့်ကျင် လှုပ်ရှားမှုကြောင့် ပြစ်ဒဏ်တိုးခံရသလို ပြစ်ဒဏ်ရက်စေ့ပြီ ဖြစ်သော်လည်း စစ်အစိုးရ၏ ဆင့်ကဲဆင့်ကဲ စွဲချက်တင်ကာ သက်တမ်းရှည်စေခြင်းဖြင့် ထောင်ကျ သက်တမ်း အကြာဆုံး နိုင်ငံရေးသမား ဖြစ်လာခဲ့သည်။

သို့သော်လည်း စစ်အစိုးရကို အရှုံးမပေးစတမ်း ကြံ့ကြံ့ခံ၍ ယုံကြည်ချက်ကို စွဲကိုင်သူအဖြစ် နိုင်ငံရေး လှုပ်ရှားသူများအကြားနှင့် အာဏာပိုင် အချို့ကပါ လေးစားခံရသူလည်း ဖြစ်သည်။

အသက် ၁၃ နှစ်မှ စတင်၍ သတင်းစာလောကသို့ ၀င်ရောက်လာခဲ့သော ဦးဝင်းတင်သည် ထောင်တွင်း ရှိနေချိန်တွင်လည်း တွေ့ဆုံဆွေးနွေး အဖြေရှာရေး စာတမ်းများ၊ နေအိမ်အကျယ်ချုပ် ကျခံနေရသော ဒေါ်အောင်ဆန်းစုကြည်ကို လွှတ်ပေးရန် တောင်းဆိုချက်များ၊ ထောင်တွင်း လူ့အခွင့်အရေး ချိုးဖောက်မှုများကို တင်ပြသော စာတမ်းများ စသည်တို့ကို ရေးသားခဲ့သည်။

ဦးဝင်းတင်သည် UNESCO မှ ချီးမြင့်သော Guillermo Cano ကမ္ဘာ့စာနယ်ဇင်း လွတ်လပ်ရေးဆု (Guillermo Cano World Press Freedom Prize), ကမ္ဘာ့ သတင်းစာများ အသင်း၏ လွတ်လပ်ရေးအတွက် ရွှေကလောင်ဆု (Newspapers' Golden Pen of Freedom), နယ်စည်းမခြား သတင်းထောက်များ ဆု (Winner of Reporters Without Border) များကို ရရှိခဲ့သည်။

(တတိယအကြိမ် ထပ်မံဖြည်စွက် တင်ပြထားသည်)
--------------------------------------

ယခုအချိန်အထိ အတည်ပြုနိုင်သော လွတ်မြောက်လာသူများ

- အင်းစိန်ထောင်မှ သတင်းစာဆရာကြီး ဦးဝင်းတင်

- ဒေါ်အောင်ဆန်းစုကြည်၏ ရုံးအဖွဲ့ တာဝန်ခံ ဗိုလ်ကြီးဝင်းထိန်

- စမ်းချောင်းလွှတ်တော်အမတ် ဦးခင်မောင်ဆွေ

- မရမ်းကုန်း လွှတ်တော်အမတ် ဒေါက်တာ မေ၀င်းမြင့်

- တောင်ငူလွှတ်တော်အမတ် ဦးအောင်စိုးမြင့်

- သပိတ်ကျင်းမြို့နယ် အမျိုးသား ဒီမိုကရေစီ အဖွဲ့ချုပ်ဝင် ဦးအေးသိန်း

--------------------------------------

သူတို့ မှတ်ချက်


မိတ်ဆွေတဦးဖြစ်သူ ဦးလှဦး
"ရောက်နေတာက ညနေ ၄ နာရီလောက်မှာ။ ထောင်က အာဏာပိုင်တွေက လိုက်ပို့တာ။ ကျနော်က မနက်ကတည်းက သတင်းရတော့ ထောင်ကိုသွားတာ၊ အချုပ်ခန်းထဲမှာ မရှိတော့ဘူးဆိုတာ သိတော့ အထဲဝင်ပြီး သွားစုံစမ်းမယ် လုပ်တာ ဦးဝင်းတင်က အိမ်ရောက်နေပြီ။

"ရောက်ကတည်းက ခုစကားပြောနေတာ ၂ နာရီလုံးလုံး ရှိပြီ။ Non Stop စကားပြောနေတာ။ လူတွေက အများကြီးဘဲဗျာ။ သတင်းထောက်တွေလည်း ပါတယ်။ ကျနော်တောင် ထိန်းလို့ မရတော့ဘူး။

"ကျန်းကျန်းမာမာပါဘဲ။ အားလုံး ကောင်းပါတယ်။ မျက်စိတော့ နဲနဲကုရမယ်။

"သူက အရမ်းတက်ကြွတာ။ ထောင်အဝတ်အစားကို မချွတ်သေးဘူး။ ချွတ်ခိုင်းလို့ကို မရဘူး။ သူက သူ့ကိုယ်သူ ထောင်ကျလို့ သတ်မှတ်ထားတယ်တဲ့၊ အပြင်လူ မဟုတ်ဘူးတဲ့ အဲသလို ပြောနေတာ။"


ဝါရင့် နိုင်ငံရေးခေါင်းဆောင်တဦး ဖြစ်သည့် ဗိုလ်မင်းလွင်
"ဝမ်းသာပါတယ်၊ နှစ်ရှည်ချခံ နေရတာလေ၊ လွတ်ပေးတဲ့အတွက် ကြိုဆိုပါတယ်၊ နောက်တခုက အမျိုးသား ပြန်လည်သင့်မြတ်ရေး အတွက်လည်း အထောက်အကူ ဖြစ်စေလိမ့်မယ်လို့ မျှော်လင့်တယ်၊ ဘာကြောင့်လဲဆိုတော့ အန်ကယ်တို့က နိုင်ငံရေး အကျဉ်းသားတွေ အားလုံး လွတ်မြောက်ဖို့အတွက် အကြံပြုနေတာပါ၊ တောင်းဆိုနေတာပါ၊"


ကရင်အမျိုးသား အစည်းအရုံး ဗဟိုဌာန သတင်းနှင့် ပြန်ကြားရေး တာဝန်ခံ ဗဒိုစောလှငွေ
"ဦးဝင်းတင်တို့လိုပေါ့လေ။ တကယ့် ကျနော်တို့ တိုင်းပြည်ရဲ့ ဘယ်လိုခေါ်မလဲ။ ဒီ ပုဂ္ဂိုလ်တွေက စတိတ်မန်းပေါ့ဗျာ။ အင်မတန်မှကို တမျိုးသားလုံးရဲ့ အကျိုးအတွက်ကလဲ တကယ် ပညာရှင်ကြီးတွေ။ ဒီလို ပုဂ္ဂိုလ်မျိုးဟာ ဟိုနဂိုကတည်းက ချုပ်ကို မချုပ်သင့်၊ ဖမ်းကို မဖမ်းသင့်ပဲနဲ့ ကျနော်တို့က သူတို့ရဲ့ အကြံဥာဏ်တွေနဲ့ ကျနော်တို့ရဲ့ တိုင်းပြည် စည်းလုံးညီညွတ်အတွက် ကောင်းကြောင်းတွေ လုပ်သင့်တာပေါ့လေ။ နောက်ပိုင်းမှာလည်းပဲ ဒီပုဂ္ဂိုလ်ကို လွှတ်မယ်၊ လွှတ်မယ်ဆိုပြီး မလွှတ်ပဲနဲ့ ထားခဲ့တယ်။ သို့သော်လည်း အခုအချိန်မှာ လွှတ်လိုက်တဲ့ အတွက်ကြောင့် ဒါကတော့ လုပ်သင့်လုပ်ထိုက်တဲ့ အလုပ်ကို အလွန်တရာ နောက်ကျပြီးမှ လုပ်တယ်လို့ပဲ ကျနော်တို့ ထင်တယ်။ ဘယ်လိုပဲ ဖြစ်ဖြစ်ပေါ့လေ။ ဒါက ဝမ်းမြောက်ဝမ်းသာစရာပါပဲ။ ပုဂ္ဂိုလ်ကြီးတွေရဲ့ အနစ်နာခံမှုတွေ အမျှော်အမြင်ကြီးမှုတွေနောက် စေတနာအမှန်နဲ့ ခိုင်မာတဲ့ ဒီစိတ်ဓါတ်ရေးရာတွေကို ကျနော်တို့ အင်မတန် လေးစားပါတယ်။ ဒီပုဂ္ဂိုလ်တွေကနေ ထွက်လာသလိုပဲ အပြင်မှာလည်းပဲ ထွက်လာရုံသာမကဘူးပေါ့လေ။ ဒီပုဂ္ဂိုလ်တွေကို လွှတ်လိုက်တယ် ဆိုပြီးတော့ အသုံးချ ရုံလောက် နာမည်ပြပြီးတော့ ကမ္ဘာကို လှည့်စားဖို့။ တိုင်းပြည်ကို လှည့်စားဖို့ လွှတ်လိုက်တဲ့ ပုံစံမျိုးမဟုတ်ဘဲနဲ့ ဒီပုဂ္ဂိုလ်ကြီးတွေဟာ တကယ့်ကို ကျနော်တို့ အမျိုးသား အကျိုးအတွက်ကို၊ တစ်တိုင်းပြည်လုံးအတွက်ကို သူတို့ စွမ်းအားရှိသမျှ ဆောင်ရွက် နိုင်အောင် ဘာပဲဖြစ်ဖြစ် လက်ရှိ အစိုးရအနေနဲ့ တခါးဖွင့်ပေးသင့်တယ်။ အားပေး သင့်တယ်ပေါ့ အမျိုးသား စည်းလုံး ညီညွတ်ရေးကို တည်ဆောက်တဲ့ လက္ခဏာကောင်း တရပ် အဖြစ်ပေါ့လေ။ ဆက်လက်ပြီးတော့ ဦးဆောင်အစိုးရသစ်အတွက် လက်တွဲဆောင် ရွက်ဖို့အတွက် ကျနော်တို့အနေနဲ့ မျှော်လင့်တယ်လို့ ကျနော်တို့က အဲဒီလိုပဲ ပြောချင်တယ်။"
-------------------------------------


အမျိုးသား ဒီမိုကရေစီ အဖွဲ့ချုပ် ပြန်ကြားရေးအဖွဲ့ဝင် ဦးသိန်းညွှန့် ပြောကြားချက်

ဦးဝင်းတင်နဲ့ ဒေါက်တာ မေဝင်းမြင့် တုိ့ ကျနော်အမှုသည်၊ ကျနော် လိုက်ခဲ့တာပါ။ သူတို့ လွတ်လာပြီဆိုတော့ ကျနော် အရမ်း ဝမ်းသာပါတယ်၊ ကျနော် ရှေ့နေအဖြစ် နှစ်ခု ပြောချင်တယ်။ သူတို့ ဘယ်အကြောင်းနဲ့ပဲ လွတ်လာ၊ လွတ်လာ ကျန်တဲ့ နိုင်ငံသားတွေ ထောင်ချ၊ အချုပ်မှာ ရှိနေတဲ့ လူတွေကိုရော လွတ်လာတာကိုရော မြင်ချင်ပါတယ်။ ကျန်တဲ့ နိုင်ငံရေး အကျဉ်းသမားတွေ အပါအဝင် လွတ်လာတယ်ဆိုတော့ ဘာဘဲ ပြောပြောဗျာ၊ အမျိုးသာ ပြန်လည် သင့်မြတ်ရေးအတွက် ကောင်းတဲ့ဟြာ ဖစ်ပါစေဗျာ။ ကျနော် ဒီလောက်ပဲ ပြောချင်တယ်။
--------------------------------------


ဦးဝင်းတင်၏ မိတ်ဆွေကြီး ဦးမောင်မောင်ခင် ပြောကြားချက်

လွှတ်တော့ မလွှတ်သေးဘူးဗျ။ ထောင်ဗူးဝတော့ ရောက်နေပြီ။ မြင်ခဲ့တဲ့ လူတွေကတော့ သေချာပြောတာဘဲ။ ဦးဝင်းတင်နဲ့ ဒေါက်တာ မေဝင်းမြင့် တို့၊ နိုင်ငံရေးသမားကြီးတွေပေါ့ဗျာ။ နှစ်တွေ ထပ်ထပ် တိုးနေတဲ့ သူတွေကိုပေါ့ဗျာ။

ကျနော် ကြားတာကတော့ ၁၂း၃ဝ နာရီခွဲ ၁ ချက်တီးလောက်မှာ လူကြီးတွေက မိန့်ခွန်းချွေပြီး လွှတ်မယ်လို့ ပြောမယ်။ သတင်းတွေ လိုက်ပြီး စုစည်း လိုက်တဲ့အခါကျတော့ သေချာဘို့ တော်တော် နီးစပ်ပါတယ်။

ကျနော်တို့ကတော့ လွှတ်ပြီဆိုမှ လွတ်ပြီလို့ ကျနော်တို့ ယုံရမှာပေါ့နော်။

၂ဝ ရက်နေ့က ကျနော် သူ့ကို သွားတွေ့တယ်။ သူသိတယ်။ သူတို့ ထောင်သားတွေကို လွှတ်လိမ့်မယ်ကွ၊ အို၊ နာ၊ ကျိုး၊ ကန်း တွေကိုတဲ့။ အသက်ကြီးတဲ့ သူတွေ၊ နာမကျန်းတဲ့ သူတွေ။ ငါတော့ အဲဒါကို ငြင်းထားတယ်။ ငါ့ကို နိုင်ငံရေးအရ ဖမ်းရင်တော့ နိုင်ငံရေးအရ လွှတ်ရမယ်လို့ ကျနော် ပြောထားတယ်တဲ့။

သူ့ကို နိုင်ငံရေးအရ လွှတ်ရင်တော့ သူထွက်လာမှာပါ။

၂ဝဝ၅ ခုနှစ်ကလည်း မိန့်ခွန်းတွေ ပါတွေချွေ၊ သူ့အကြောင်းတွေ ပါတွေပြော၊ ထမင်းတွေ ဘာတွေ ကျွေးပြီးတော့ အထဲ ပြန်ခေါ်သွားတာ။

ကျနော်က ဒီမှာ တယ်လီဖုန်းတွေ စောင့်နေတာ။ လွှတ်လာရင် အစိုးဘက်က လူကြီးတွေ ကျနော့်အိမ်ကိုဘဲ လာပို့ပေးမှာပါ။ ကျနော့်အိမ်က ထောင်နဲ့ မျက်နှာချင်းဆိုင်မှာဘဲလေ။ ဒီမှာလည်း စောင့်နေကြတာ။
--------------------------------------


မြန်မာစံတော်ချိန် မွန်းလဲ ၂း၁၀ မိနစ်တွင် ဦးဝင်းတင်၏ မိတ်ဆွေကြီး ဦးမောင်မောင်ခင် ပြောကြားချက်

"နောက်ဆုံး ကြားရတဲ့ သတင်းကတော့ ထောင်ဗူးဝတော့ ရောက်နေပြီလို့ ကြားတယ်။ ညနေပိုင်းမှ လွတ်မယ်လို့ ကြားတယ်။

"ခုက လွှတ်တော့ လွှတ်နေတယ်ဗျ။ ခါးပိုက်နိုက်တွေ၊ သူခိုးတွေ၊ မှောင်ခိုတဲ့ မိန်းမတွေ၊ ချဲအမှုတွေနဲ့ ဖမ်းထားတဲ့ သူတွေလည်း တသုတ်ပြီး တသုတ် လွှတ်နေတာပဲလေ။

"လွတ်နေတာကတော့ ၉ဝ၊ ၁ဝဝ တော့ မကတော့ဘူး။ ထောင်ကားတွေနဲ့ လိုက်ပို့နေတယ်။ လုံခြုံရေးတွေတော့ မရှိပါဘူး။ ဒီနေ့တော့ လွှတ်မဲ့သူတွေရဲ့ မိသားစုဝင်တွေ အပြင်မှာ စောင့်နေတာတွေတော့ အများကြီးဘဲ ရာဂဏန်းတော့ ရှိတယ်။ တခြား အစောင့်တွေတော့ မရှိပါဘူး။

"ဦးဝင်းတင်ကို သွားစောင့်တာတော့ ကျနော်တို့ မိသားစုဘဲ ရှိမယ်။ နောက်ထပ် တနာရီခြား ခေါ်ပေးပါ။"

နောက်ဆက်တွဲကို ဆက်လက် ထုတ်ပြန်သွားမှာ ဖြစ်သည်။

(မဇ္ဈိမမှ ရယူသည်)